Новости

На предавањето, д-р. мед. науки Наташа Најдановска-Алуловска, специјалист по педијатрија, ги сподели најважните совети и препораки за правилна нега на новороденчето. Таа се осврна на секојдневните предизвици со кои се соочуваат родителите, вклучувајќи ги негата на кожата, одржувањето соодветна собна температура, хигиената, бањањето и другите важни аспекти од грижата за бебето.

Во практичниот дел од предавањето, м-р Дијана Мариновска, детски физиотерапевт, демонстрираше вежби и активности што родителите можат да ги применуваат додека бебето е будно, со цел да го поттикнат неговиот правилен моторен развој. Присутните имаа можност да добијат корисни насоки за правилно позиционирање, движење и стимулација на бебето уште од најраната возраст.

Предавањето се одвиваше во интерактивна атмосфера, а идните родители имаа можност да поставуваат прашања и да добијат стручни совети од предавачите.

Следното предавање ќе се одржи на 4 ноември и ќе биде посветено на темата „Исхрана кај новороденче“. Предавач ќе биде д-р Радица Муратовска-Делимитова.

Со ваквите едукативни предавања, Клиничката болница „Аџибадем Систина“ продолжува да им обезбедува стручна поддршка и практични совети на идните родители, помагајќи им со поголема сигурност и самодоверба да ги пречекаат првите денови со своето новороденче.